Ноҳияи Шамсиддин Шоҳин (собиқ Шӯрообод) дар қисми ҷанубу шарқии Ҷумҳурии Тоҷикистон ҷойгир аст. Куҳистони ноҳия ба каторкуҳҳои Ҳазрати Шоҳ мансуб буда, маркази ноҳия дар баландии 2000 метр аз сатҳи баҳр ҷой гирифтааст.  Баландии каторкуҳҳои ноҳия ба 2,5-3 ҳазор метр мерасанд. Масоҳати ноҳия 228,4 километри мураббаро ташкил дода, дар Шарқ бо Давлати Исломии Афғонистон (144км), дар Шарқу Шимол бо Вилояти Мухтори Куҳистони Бадахшон (ноҳияи Дарвоз), аз Шимол бо ноҳияи Муъминобод, аз Fapб бо шаҳри Кӯлоб ва аз Ҷануб бо ноҳияи М.С.А Ҳамадонӣ ҳамсарҳад аст. Нуқтаҳои охирини қисматҳои ноҳия (димоға) дар Шарқ- Паси куҳ (Ҷамоати ба номи Н. Маҳмудов), Шимол - Ҳазрати Эмом (Ҷамоати Лангардара), Fapб - Туғмагӣ (Ҷамоати Чагам) ва Ҷануб - Баҳорак (Ҷамоати Саричашма) ба ҳисоб мераванд.

Аз маркази ноҳия то шаҳри Кӯлоб 32 км, шаҳри Курғонтеппа 197 км ва то шаҳри Душанбе 237 км роҳи автомобилӣ тул мекашад.

Иқлими ноҳия якранг нест. Дар мавзеи Терай, гармии муътадил ва дар мавзеъҳои Даштиҷуму Саричашма иқлими субтропикии хушк ҳукмфармост. Дар Терай зимистон сард буда, тобистони мулоим (салқин) дорад. Ҳарорати ҳаво зимистон ба ҳисоби миёна - 10-20 0С дар баландкуҳҳо - 20-25 0С хунук ва тобистон +30-35 0С гарм мешавад. Миқдори боришот ба ҳисоби миёна 400-500 миллиметр мебошад. Фаслҳои тирамоҳ ва зимистон аз тарафи шимолу шарқ ва ҷанубу шарқ бодҳои афғонӣ бо суръати баланд мевазад. Ин мавзеъ фасли тобистон барои зиндагӣ ва парвариши чорво хеле мувофиқ аст. Минтақаи муътадили даштӣ буда, заминҳояш пурра кишт мешаванд. Дар ҷойҳои боқимонда (доманакуҳҳо) растаниҳои мавсимӣ (эфимерӣ) мерӯянд. Иқлими водиҳои Даштиҷум ва Саричашма зимистон мулоим ва тобистон гарм аст. Ҳарорати ҳаво тобистон +30-40 0С буда, зимистон мулоим ва баъзан то -5 0С паст мефурояд. Микдори боришот ба 250- 300 миллиметр баробар аст.  

        Бояд зикр намуд, ки аз 3.марти соли 2016 бо қарори маҷлиси олии Ҷумҳурии Тоҷикистон номи ноҳияи Шӯрообод ба Шамсиддин Шоҳин иваз карда шуд.

Дар ҳудуди ноҳияи Шамсиддини Шоҳин 7  ҷамоати деҳот Шӯрообод, Доғистон, Саричашма, Чагам, ба номи Нуриддин Маҳмудов, Даштиҷум ва Лангардара  арзи ҳастӣ дошта, ба санаи  1 январи соли 2016 дар ҷамоатҳои деҳоти ноҳия 115 деҳа, 6882 хоҷагӣ ва 52062 нафар аҳолӣ зиндагӣ мекунад.. Аз шумораи умумии аҳолӣ 49800 нафарашонро тоҷикон (95,66%)  ва 2262 нафари дигарро узбекзабонҳо (4,34%)  ташкил медиҳанд. Аҳолии узбекзабон асосан дар ҷамоатҳои деҳоти Чагам ва Саричашма зиндагӣ мекунанд.  

    Ноҳияи Шамсиддин Шоҳин ҳамчун ноҳияи куҳистону аграрӣ ва ҳамсоли Истиқлолияти давлатии Ҷумҳурии Тоҷикистон рӯз аз рӯз ободу зебо гардида, бо андешидани як қатор тадбирҳои мушаххас дар соҳаҳои мухталифи хоҷагии халқи ноҳия  ба пешравиҳои назаррас ноил мегардад.