Тибқи иттилооти ба дастомада, сохтмони муассисаи мазкур моҳи марти соли 2021 оғоз гардидааст. Муассиса аз ҳисоби Бонки Исломи Рушд бо дастгирии Вазорати маориф ва илми Ҷумҳурии Тоҷикистон аз ҷониби Ҷамъияти дорои масъулияташ маҳдуди “Фаридун” - и шаҳри Кӯлоб сохта шудааст.

Муассисаи таълимӣ аз ду ошёна иборат буда, дорои 10 синфхонаи таълимӣ бо тамоми шароити муосир мебошад. Муассиса дорои майдончаи варзишӣ буда, дар гирду атроф дарахтони сояафкан шинонида шудааст. Шароити муассисаи таълимӣ ҳозиразамон буда, кабинетҳои фаннии физика, химия, биология, технологияи иттилоотӣ ва Маркази инкишофи барвақтии кӯдакон дорад. Ҳамаи синфхонаҳо бо тахтаҳои электронӣ ва компютер ҷиҳозонида шудаанд. Муассисаи таълимӣ бинои ёрирасони бо андозаи 20 м барои нигоҳдории захираҳои зимистонаро доро аст.

Масоҳати умумии қитъаи замини муассисаи таълимӣ 1,7 га ва масоҳати бинои таълимӣ 568 метрро ташкил медиҳад, масоҳати синфхонаҳо 508 метр, иқтидори лоиҳавӣ барои 240 нафар хонанда дар як баст мебошад. Муассисаи таълимӣ бо Маркази гармидиҳӣ таъмин буда, метавонад ҳамаи синфхонаҳоро дар як вақт гарм нигоҳ дорад.

Муассисаи таълимӣ хонандагонро дар ду баст ва се зинаи таҳсилот ба таълим фаро гирифта, аз ҳудуди деҳа 456 нафар хонанда ба таҳсил фаро гирифта шуда, ба онҳо 39 нафар омӯзгори соҳибтаҷриба таълиму тарбия медиҳанд.